დიდგორში გამოვლენილი სფერული ფორმის ელემენტები შუა საუკუნის დროინდელი საზარბაზნე ქვები არ აღმოჩნდა

დიდგორში, საგზაო ინფრასტრუქტურის მოწყობის სამუშაოების შედეგად გამოვლენილი სფერული ფორმის ელემენტები, რომელიც პირველადი მონაცემებით,  გვიანი  შუა საუკუნეების დროინდელ საზარბაზნე ქვებს წააგავდა, არქეოლოგიურ ობიექტებს არ წარმოადგენენ.

საქართველოს კულტურული მემკვიდრეობის დაცვის ეროვნული სააგენტოს არქეოლოგების შეფასებით, რომლებიც ორი დღის წინ ადგილზე იმყოფებოდნენ, აღნიშნული ელემენტები გეოლოგიური წარმონაქმნებია და მათ ისტორიოგრაფიასთან და არქეოლოგიასთან საერთო არაფერი აქვთ.

სპეციალისტების არგუმენტირებული ვარაუდით, გამოვლენილი გეოლოგიური ქვები კონკრეციებია (ლათინურად koncretio, რაც ნიშნავს შეზრდას, შედედებას), რომლებიც რადიალურ-სხივური აგებულების მომრგვალო ფორმის მინერალურ აგრეგატებს წარმოადგენენ და დანალექ ქანებსა და ფხვიერ ნალექებში წარმოიქმნებიან.

ფორმით ისინი შესაძლებელია სფეროსებრ, ლინზისებრ, ან შეზრდილ კონკრეციებს წარმოადგენდნენ. ასეთი ტიპის მინერალური წარმონაქმნები ზომებითაც განსხვავდებიან და მათი ამპლიტუდა რამდენიმე მილიმეტრიდან რამდენიმე სანტიმეტრამდე მერყეობს (იშვიათად 1 მ-საც აღწევს). ოკეანის ფსკერზე გავრცელებულია რკინა-მანგანუმის კონკრეციები, რომელთაც სამრეწველო მნიშვნელობა აქვს.

 

 

The post დიდგორში გამოვლენილი სფერული ფორმის ელემენტები შუა საუკუნის დროინდელი საზარბაზნე ქვები არ აღმოჩნდა appeared first on 1TV.